Satua Bali I Siap Selem

i siap selem

Ada katuturan satua, I Siap Selem ngelah pianak papitu. Ane paling cerik, tusing ngelah bulu, madan I Doglagan. Sawai-wai, I Siap Selem ngalih amah nganti ke dauh tukad. Sedek dina anu, ritatkala I Siap Selem teken panak-panakne ngalih amah di dauh tukad, lantas langite megrudug nyihnayang lakar ujan.

“Me, lan jani mulih. Ento guleme gede gati,” keto pianak sane kelihan ngomong.

“Ae me, tiang takut nyanan iraga ujanan dini,” pianak sane lianan milu masaut.

“Cening jak mekejang, lan jani di umahe ento malu maembon. Yen jani iraga mulih pedas iraga ujanan. Tolih ento adine, I Doglagan. Ia tusing ngelah bulu. Yen ia ujanan pedas bisa mati,” keto I Siap Selem maorahan teken pianak-pianakne. Lantas I Siap Selem teken pianakne makapitu, ngungsi keumahe ane ada di sisin tukade ento.

“Jero, jero sane madue pondok niki, dados ke tiang milu maembon?” keto I Siap Selem metakon.

Lantas pesu ane ngelah umahe ento, boya ja sios wantah meong lua madan Meng Kuuk.

“Ngeong, ngeong… ih cai Siap Selem, ngujang cai mai?”

“Jero Meong, tiang mriki jagi maembon mawinan tiang madue pianak-pianak kari alit. Tusing melah keneh tiange ngajakin ngrobok ujan.”

“Nah lamun buka keto, lan mai macelep ka tengah,” ditu lantas Meng Kuuk ngajakin I Siap Selem lan pianakne mulihan. Sajaan lantas tuun ujan bales pesan ngaenang tukade blabar. 

Meng Kuuk nanjenin I Siap Selem apanga nginep di umahne. I Siap Selem nyak nginep, kerana ia medalem pianakne. Petengne I Siap Selem tusing ngidayang pules. Ditu lantas ia ningeh Meng Kuuk merembug ajaka pianak-pianakne.

“Cening ajak mekejang, petenge ene iraga lakar maan be jaen. Ne meme ngelah siap pengina ngajak pianak papitu” keto munyine Meng Kuuk.

“Tiang baang kibulne me!” keto pesaut panakne.

“Tiang baang kampidne me!” pianak sane len milu mesaut.

Ningeh tutur Meng Kuuke teken pianak-pianakne buka keto, lantas I Siap Selem nundunin pianak-pianakne.

“Ning bangun ning. Ento Meng Kuuk nagih ngamah iraga. Mai jani iraga megedi uling dini. Cening malu mekeber nyanan Meme ngemilunin”. Lantas seka besik pianak I Siap Seleme makeber ngecosin tukad.

Brrr.. Burr.. Suuak… Keto pianakne ane paling keliha makeber.

“Apa ento Siap Selem?” metakon Meng Kuuk

“Ento don timbule ulung” keto I Siap Selem nyautin

Brrr.. Burr.. Suuak… keto pianak sane lenan makeber

“Apa ento Siap Selem?” Meng Kuuk buin mtakon

“Ento don tiinge ulung” pesautne Siap Selem.

Lantas seka besik pianakne I Siap Selem mekeber ngelewatin tukad. Jani enu I Siap Selem teken I Doglagan dogen ditu. Mabesen lantas I Siap Selem teken I Doglagan.

“Cening Doglagan, jani Meme lakar ngalahin cening dini. Nyanan yen lakar amaha teken I Meng Kuuk, duegang ibane madaya. Orahang iban caine nu pait, nu belig, sing pantes daar malu. Tunden Ia ngubuhin cai nganti tumbuh bulu. Yen suba tumbuh bulun caine, ditu lantas cai mekeber mulih”.

Lantas I Siap Selem makeber ngentasin pangkung. Brrr.. Burr.. Suuak… keto munyin pakeber I Siap Seleme.

“Apa ento Siap Selem?” metakon lantas I Meng Kuuk. Tusing ada ne nyautin. Ditu lantas I Meng Kuuk nelokin pedemane I Siap Selem. Mekesiab lantas ia mare dapetanga tuah ada I Doglagan ditu.

“Beh, pasti busan ane orahange don-donan ulung ento, boya ja len wantah I Siap Selem teken pianak-pianakne”

“Meme kanggoang dogen suba pitike cenik ene daar” keto panakne mamunyi.

“Duh jero para meong sinamian, sampunang tiang ajenga mangkin. Tiang konden tumbuh bulu sinah eben tiange pait, belig, miwah ten jaen ajeng. Pinih becik ubuhin dumun tiang nganti tumbuh bulu, drika wawu dados ajeng” I Doglagan mautsaha madaya upaya apang sing amaha teken I Meng Kuuk lan pianak-pianakne. 

I Meng Kuuk kena baana kabelog-belog baan I Doglagan. Ia nyak ngubuhin I Doglagan. I Doglagan wadahina guungan lan sabilang wai baanga ngamah. Gelisin satua, jani bulun I Doglagane suba tumbuh. Meng Kuuk lan pianakne pada repot ngae lakar basa anggona ngolah ben Doglagane.

“Eh cai Doglagan, jani cai lakar amah kai”

“Nggih dados nika jero. Nanging apang eben tiange jaenan, kebiurang dumun tiang ping telu”

Meng Kuuk lantas ngebiurang I Doglagan. Prrrr. Prrrr. Prrrr. Pas kebiurane ping telu, mekeber lantas I Doglagan. Meng Kuuk nguber I Doglagan lan tingalina ia ngenceg duur batune. Meng Kuuk nyagrep nanging I Doglagan ngenggalang makeber. Ane sagrepa I Meng Kuuk boya ja len tuah batu ane ngranaang gigine pungak. I Doglagan makeber sambilanga ngendingin I Meng Kuuk.

“Ngik ngak ngik nguk gigi pungak nyaplok batu. Ngik ngak ngik nguk gigi pungak nyaplok batu.”

Keto suba upah anake ane demen mebikas corah. Iraga mangda setata madaya upaya yening nepukin unduk lan ngelawan sane mabikas jele.

I Wayan Ardika Saya adalah Seorang Guru yang mengajar di SDN 6 Yehembang, Kec. Mendoyo, Kab. Jembrana, Bali. Melalui Blog ini, saya ingin terus belajar sambil berbagi.

0 Response to "Satua Bali I Siap Selem"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel